Djóni Nolsøe Joensen, landsstýrismaður í barna- og útbúgvingarmálum, og Sirið Stenberg,
landsstýriskvinna í almanna- og mentamálum, settu í januar 2024 ein arbeiðsbólk at gera eitt
ítøkiligt uppskot til, hvussu eitt heildagstilboð kann skipast í Skúlanum á Trøðni. Hetta arbeiðið
er sett í verk við tí fyri eyga at fyribyrgja óneyðug skifti hjá børnum í serskúla, ið verða mett at
hava gagn av einum samanhangandi skúla- og frítíðarskúlatilboði.

Mett verður, at fleiri fyrimunir eru við einum heildagstilboði. Nevnast kunnu:
- Størri samanhangur í degnum hjá barni og foreldrum
- Felags leiðsla og starvsfólkahópur
- Færri kontaktflatir við møguleika fyri einum tættari tilknýti til starvsfólk
- Starvsfólk ganga aftur bæði í skúla- og frítíðarpartinum
- Trygt og kent umhvørvi (samanhangur)
- Fyribyrgja strongd hjá bæði børnum og foreldrum